ንመስርሒ ግድብ ኣባይ እናተብሃለ ዝቐርብ ንብረት ብመኻይን ኣናተፅዓነ ናብ ወልቀ ሃፍታማት ነጋዶ ይሽየጥ ከም ዘሎ ነበርቲ ከተማ ባህርዳር ኣቃሊዖም፣

እቶም ነበርቲ ከም ዝገለፅዎ፤  ኣብ ከተማ ባህር-ዳር ሓንቲ  ኮድ 3- 00746 ዝዓይነታ  ቮልቮ መኪና ፂዒናቶ ዝነበረት ሰሚንቶ ኣብ ናይ ኣይተ ይልማ ማሩ መኻዚኖ  ኣራጊፋ ክትወፅእ ኢድ ብኢድ  ብ30 ግንቦት 2005 ዓ/ም ብነባሪ ህዝቢ  ከም ዝተትሓዘትን፤ ካልእ ኮድ 3-05704  ዝዓይነታ መኪና ድማ ዝፀዓነቶ ላሜራ ኣራጊፋ ከይተትሓዘት ካብቲ ቦታ ክተመልጥ ከም ዝኸኣለት ተፈሊጡ፣

ብካልእ ወገን ኣብ ዞባ ሰሜናዊ ምዕራብ ትግራይ ነበርቲ  ከተማ ሽረ-እንዳስላሰ ንኽልተ ሰሙን ዝኣክል መስመር ፅሩይ ዝስተ ማይ ስለ ዝተቛረፀ ፅርየቱ ካብ ዘይሓለወ ጉድጓድ ማይ ክሰትዩ ብምጋዳዶም ንማይ ወለድ ሕማም ተቓልዖም ኣብ ከቢድ ማሕበራዊ ፀገማት ከም ዝርከቡ ንምፍላጥ ተኻኢሉ፣

መራሕቲ ሰበ-ስልጣን ወያነ  ድሕሪ ደጊም ብሕፅረት ዝስተ ፁሩይ ማይ ዝሳቐ ህዝቢ ኣብ ትግራይ ኣይክህልወናን እናበሉ ዝምድርዎ፤ ካብ ዘረባ ሓሊፉ ብተግባር ሰለ ዘይስነ፣ ኣብ ዝተፈላለዩ ከባብታት ዝነብር ሕብረተሰብ ቐፃሊ ንፀጋማቱ ቆላሕታ ብምስኣኑ መረረት ኣብ ምስማዕ ከምዝርከብ እቲ ዝተረኸበ ሓበሬታ የረድእ፣