ኣብ ክልል ዓፋር ዝርከብ ሰራዊት ገዛኢ ጉጅለ ኢህወዴግ ኣብ ልዕሊ ነበርቲ እቲ ከባቢ ናይ ምፍርራሕን ምንእኣስን ተግባር ይፍፅም ምህላዉ ካብ’ቲ ከባቢ ምንጭታትና ዝለኣኽዎ ሓበሬታ ኣመልኪቱ፣

  ብመሰረት እቲ ሓበሬታ ኣብ ክልል ዓፋር ወረዳ በራሕለ ቀበሌ ባዳ ዝነብሩ ወገናትና ኣብቲ ከባቢ ዓሪዱ ብዝርከብ ናይ መበል 21 ክፍለ ሰራዊት 5^ይ ሬጅመንት ዝኾነ ሰራዊት ኢህወዴግ  ግፍዕታት ይወርዶም ምህላዉ ዝገለፀ እቲ ሓበሬታ ከም ውፅኢቱ ድማ እዞም ነበርቲ ኣብ’ዚ  ከባቢና ዝርከብ ሰራዊት ይውፅአልና ብምባል ብ26 ጥቅምቲ 2007 ዓ/ም ሓያል ናይ ተቓውሞ ሰለማዊ ሰልፊ ከም ዘካየዱ ተፈሊጡ።

   ብተወሳኺ ነበርቲ ባዳ ኣብቲ ዘካየድዎ ተቓውሞ ካብ ዘስምዕዎም ዝነበሩ ጭሮሖታት ገለ ንምጥቃስ “ባህልናን ወግዕናን ዘበላሽዉ ዘለዉ ወተሃደራት  ካብ ከባቢና ይውፁኡልና፤ እዞም ወተሃደራት ከም ወገኖም ኣይሪኡናን፤ ኣብ ልዕሌና  ናይ ፅልኣት መንፈስ  ኣለዎም፣” ዝብሉን ካልኦትን ምዃኖም ዝገለፀ  እቲ ሓበሬታ፤ ብወገን ኣማሓደርቲ እቲ ክልል ግን ብጀካ ክነማዓራርዮ ኢና ዝብል ናይ መተዓሻሻዊ ቃል ከተግብርዎ ኣይተራዩን ክብሉ ነበርቲ ኣብ ልዕሊ እቲ ስርዓት ዘለዎም ፅልኣት ይገልፁ ምህላዎም ምንጭታትና ኣረዲኦም።