ኣብ ከተማ ዓድዋ ክካየድ ኣብ ዝቐነየ ናይ ሰራሕተኛታት መንግስቲ ኣኼባ ኣብ ምሕደራ ዘሎ ፀገማት ኣመልኪቶም ሕቶታት ዘልዓሉ ሰባት ከም ዝተኣሰሩ ምንጭታትና ካብታ ከተማ ሓቢሮም።

ኣብቲ ንተኻታታሊ መዓልታት ብካድረታት ህወሓት-ማሌሊት እናተመርሐ ክካየድ ዝቐነየ ኣኼባ እቶም ተኣከብቲ ሰራሕተኛታት መንግስቲ ካብ ዘልዓልዎ ሓሳባት ሰናይ ምሕደራ ዝብሃል  የለን፤ ፍትሒ ጠቕሊሉ ጠፊኡ፤ ህወሓት ኢህወደግ ይኽተሎ ብዘሎ ብልሹዉ ምሕደራ ህዝብና ኣብ ቅልዉላዉ ወዲቑ ይርከብ ዝብሉን ካልኦትን ከም ዝነበሩ ተፈሊጡ።

ካብቶም ኣብ’ቲ ኣኼባ ሓያል ናይ ተቓዉሞ ሓሳቦም ዘቕረቡ ገለ ሰባት ንምጥቃስ ኣብ ዓድዋ ናይ ዝርከብ ዩኒቨርሲቲ ምክትል ሓላፊ ኣቶ ካሕሳይ ደስታ፤ ናይ’ቲ ዩኒቨርሲቲ ፀሓፊ ይግዛዉ በየነን ካልኦትን ዝርከብዎም ኮይኖም ህዝብና ኣብ ዝኸፍአ ናይ መነባብሮ ደረጃ እናሃለወ ሰበ ስልጣን እዚ ስርዓት ግን ብክራይ ኣካብነት ሃፍቲሞም ክብሉ ሓሳቦም ስለ ዝገለፁ ሹዑ ንሹዑ ናብ ቤት ማእሰርቲ ከም ዝተወስዱ ንምፍላጥ ተኻኢሉ።