ኣምሓደርቲ ዞባ ማእኸል መናእሰይ ብብዝሒ ናብ ቃልስን ስደትን ይዉሕዙ ብምህላዎም ተደናጊፆም ንህዝቢ ኣብ ቀፃሊ ኣኼባታት ፀሚዶሞም ከም ዘለዉ ምንጭታትና ሓቢሮም።

ምንጭታትና ካብቲ ቦታ ከም ዝሓበርዎ ኣምሓዳሪ ወረዳ ኣሕፈሮም ሰለሙን ይሕደጎን ኣመሓዳሪ ጣብያ ዝባን ጒላ ኣለነ ተስፋማርያምን ሓላፊ ፀጥታ እታ ጣብያ ኣባዲ ገብረኺዳንን ዝተብሃሉ ካድረታት እቲ ስርዓት ንህዝቢ ጣብያ ዝባን ጒላ ጭንቀት ዝወለዶ ጎስጓስ ንምክያድ ኣብ ቀፃሊ ኣኼባታት ፀሚዶሞም ከም ዝርከቡ ተፈሊጡ።

ንሳቶም ኣብቲ ዘካይድዎ ዘለዉ ኣኼባታት ነቶም ብብዝሒ ናብ ዴምህት ዝስለፉ መናእሰይ ደዉ እንተዳኣ ኣቢልኩሞም ንዓመት ምሉእ ዝኣክል ቀለብ ክንህበኩም ኢና። ስደት ንዝኸዱ‘ዉን ብተመሳሳሊ ደዉ ክተብልዎም ኣለኩም እናበሉ ነዚ ዘይገብረ ስድራ ግና ስጉምቲ ክንወስደሉ ምዃና ይፍለጥ እናበሉ ምፍርራርሕ ዝተመልኦ ዘረባብታት ኣብ ምዝራብ ከም ዝርከቡ ምንጭታት ኣረዲኦም።