ኣብ ከተማ ሽረ እንዳሰላሰ ዝርከቡ ወነንቲ ቤት ቁርስታትን ቤት ሻሂን ቀረብ ሽኮር ብምስኣኖም ትካላቶም ክዓፅዉ ይግደዱ ኣብ ዘለዉሉ ነቲ ፀግም ዝፈትሕ ምምሕዳር ብዘይምርካቦም መረረቶም ይገልፁ ምህላዎም ተሓቢሩ፣

ኣብ ዞባ ሰሜናዊ ምዕራብ ትግራይ ከተማ ሽረ እንዳስላሰ ዝነብር ህዝቢ ብከንቲባ እታ ከተማ መረሳ ኣታኽልቲ ብ5 ጥቅምቲ 2007 ዓ.ም ኣብ ዝተገብረሉ ኣኼባ ወነንቲ ቤት ቁርስን ካልኦት ንስርሖም ሽኮር ዘድልዮም ትካልትን ሽኮር ጠቕሊሉ ካብ ዝጠፍእ ነዊሕ ግዜ ኣቑፂሩ እናሃለወ ነዚ ፀገም ተዓዚቡ ፍታሕ ዝገብር መንግስታዊ ኣካል ብዘይምህላዉ ንግዲ ፍቓድኩም ተረከቡና ክብሉ ብምረት ከም ዝተዛረቡ ምንጭታትና ካብ’ታ ከተማ ገሊፆም፣

ነቲ መድረኽ ዝመርሕ ዝነበረ ከንቲባ መረሳ ኣታኽልቲ ነቲ ዝቐረበሉ ኣዋጣሪ ሕቶታት ብኣግባቡ ክምልስ ዓቕሚ ብምስኣኑ። “እሞ ኣነ ሽኮር ክኾነልኩም ዲኹም ደሊኹምኒ” ክብል ኣግባብነት ዘይብሉ መልሲ ስለ ዝሃቦም ብትዕቢቱ ዝቓሓሩ ተኣከብቲ  ከም መጠን ኣመሓዳሪ ፍታሕ ክትገብር ኢና ንዛረብ ዘለና ብምባል ነቲ ብሰንኪ ስእነት ቀረብ ሃለኽቲ ነገራት ኣብ መነባብርኦም ዝበፅሖም ዘሎ ቅልዉላዉ ከም ዝተዛረቡ ንምፍላጥ ተኻኢሉ፣