ኣብ ዞባ ደቡብ ትግራይ ከተማ ኣላማጣ ሓደ ኣባል ፖሊስ ትራፊክ መንነቶም ብዘይተፈለጡ ሰባት ብኻራ ተወጊኡ 3 ሓምለ 2007 ዓ/ም ሞይቱ ከም ዝተረኸበ ምንጭታት ካብታ ከተማ ሓቢሮም።

ምንጭታትና ካብታ ከተማ ከም ዝሓበርዎ ነባርነቱ ኣብ ዞባ ደቡብ ትግራይ ከተማ ኣላማጣ ኣባል ፖሊስ ትራፊክ ዝኾነ ቢያርግልኝ ውቤ ሸምሱ ዝተብሃለ ንሱ ኣብ መስመር ኣላማጣ- መኾኒ መንገዲ ዝሰርሕ እንትኾን ብተደጋጋሚ ብህዝቢ ከተማ ኣላማጣን ከባቢኣን ጉቦ ትበልዕ ኢኻ እናተብሃለ ይንቀፈ ከም ዝነበረን ካብ’ቲ ነውራም ተግባሩ ክቑጠብ ስለ ዘይከኣለ መንነቶም ብዘይተፈለጡ  ወገናት ሰለስተ ክፍሊ ኣካላቱ ብኻራ ተወጊኡ ኣብ መንገዲ ወዲቑ ሰባት ከም ዝረኸብዎ ንምፍላጥ ተኻኢሉ።

እቲ ሓበሬታ ወሲኹ ከም ዝገለፆ ኣባል ትራፊክ ፖሊስ ቢያርግልኝ ውቤ ቅድሚ ሕዚ’ውን ኣብ መስመር ማይ ጨው መኾኒ ይሰርሕ ከም ዝነበረን ጉቦኛ ብምዃኑ ብመራሕቲ መኪና ፅሉእ ከም ዝኾነን ህዝቢ ይዛረበሉ ከም ዝነበረን ድሕሪ ምግላፅ ብካራ ተወጊኡ ተደርብዩ ተረኺቡ ምስ ተብሃለ ይግብኦ እዩ ብምባል ህዝቢ እቲ ከባብን መራሕቲ መኻይንን መዛረቢ ዛዕብ ገይሮሞ ከም ዘለው እቲ ሓበሬታ ወሲኹ ኣረዲኡ።