ኣብ ዞባ ምዕራብ ትግራይ ክካየድ ዝቐነየ ገምጋም ኣብ ልዕሊ ናይ ፍትሒ ኣካላት ሰፊሕ ነቐፌታ ስለ ዝቐረበ ናይ ይምሰል ምእሳርን ምብራርን ስምጉቲ ከም ዝተወሰደ ተገሊፁ።

ካብቲ ቦታ ምንጭታትና ከም ዝበልዎ፣ ኣብ ዞባ ምዕራብ ከተማ ሑመራ ክካየድ ኣብ ዝቐነየ ገምጋም ብርክት ዝበሉ ኣካላት ፍትሒ ብህዝቢ ሰፊሕ ነቐፌታ ስለ ቐረበሎም ዝተኣስሩን ዝተባረሩን ከም ዘለዉ ድሕሪ ምግላፅ፣ በዚ መሰረት ናይ ከተማ ሑመራ ዓቃቢ ሕጊ ዝነበረ ሙሉጌታ ተኽለን ናይ ዞባ ምዕራብ ሓላፊ ዓቃቢ ሕጊ ቴድሮስን ብግዕዝይና ካብ ስርሖም ይባረሩ ዝተብሃሉ እንትኾኑ።

ብተመሳሳሊ ኣብ ወረዳ ቃፍታ ሑመራ ዓቀብቲ ሕጊ ዝነበሩ ሄኖክ ሃይለን ኪዳነ ተስፋይን  ከምኡ'ዉን ናይ ከተማ ሑመራ ዳይና ዝነበረ ሰለሙን ዝተብሃሉ ድማ እቲ ፈፂመሞ ዝተብሃሉ ጉዳይ ኣብ መስርሕ ክሲ ዘሎ ዝቐረበሎም ክሲ ክሳብ ዝፃረ ብዝብል ድማ ኣብ ቤት ማእሰርቲ ዝርከቡ እኳ እንተኾኑ፣ ህዝቢ ግን ሰበ ስልጣን ገዛኢ ስርዓት ነቲ ዝገፈለ ህዝባዊ ስምዒት ንግዝኡ ንምዝሕሓል የባርሩን ይኣስሩን እንተሃለዉ እኳ ግዕዝይና ብምድራቕ ፍትሒ ንኽነግስ ብዘላቒ ክሰርሑ እዮም ዝብል እምነት ከም ዘይብሉ ምንጭታትና ካብቲ ቦታ ዝለኣኽዎ ሓበሬታ የረድእ።