ቤት ምኽሪ ከተማ ሑመራ ካብ 21 ሓምለ 2007 ዓ/ም ጀሚሩ ኣብ ዘካየዶ ኣኼባ ብርክት ዝበለ ናይ ተቓዉሞ ሕቶታት ከም ዝተልዓለ ተፈሊጡ።

በቲ ዝተጠቕሰ ዕለት ዝተጀመረ ኣኼባ ቤት ምኽሪ ከተማ ሑመራ መራሒ እቲ መድረኽ ከንቲባ ከተማ ሑመራ ሰለሙን ኣየነዉ እንትኸዉን ኣብቲ ኣኼባ ካብ ዝተላዕሉ ሕቶታት ንምጥቃስ ብሰንኪ ምቁራፅ መብራህቲ ስራሕትና ክንሰርሕ ኣይክኣልና፤ ሰለ ምንታይከ እቲ ፀገሙ ዘይንገረናን ዘይፍታሕን?፤ ኔት-ዎርክ ብተደጋጋሚ ይጠፍእ ኣሎ ብሰንኪ እዚ ናይ ባንኪ ኣገልግሎት ክንረክብ ኣይክኣልናን እንታይ እዩ እቲ ፀገም?፤ ላዕለዎት ሰበ-ስልጣን ናብ'ዛ ከተማ እንትኣትዉን ኣብዚ ከባቢ ግጭት እንትላዓልን ንምንታይ እዮም እዞም ፀገመት ዝጋደዱ ዝብሉን ካልእን ከም ዝኾኑ ንምፍላጥ ተኻኢሉ።

ብተወሳኺ  ንምሉእ ጎደናታት እታ ከተማ ኮብልስቶን መስርሒ ተባሂሉ ባጀት ተሰሊዑ እናሃለወ እቲ ኮብልስተን ኣብ ከባቢ መንሃርያ ጥራሕ እዩ ዝስራሕ ዘሎ ስለ'ዚ ንከተማ ምሉእ መስርሒ ተባሂሉ ዘተመደበ ባጀት ኣበይ ኣእቲኹሞ ዝብሉን ካልኦትን ብርክት ዝበሉ ሕቶታት ዋላ'ኳ እንተተልዓሉ በቲ መራሒ መድረኽ ዘዕግብ ምላሽ ከም ዘይተወሃበ ተፈሊጡ።