ኣብ ክልል ቤንሻንጉል ጉሙዝ ካብ ሸርቆሌ ጀሚሩ ክሳብ ናይ ህዳሴ ግድብ ዝስርሐሉ ዘሎ ቦታ ንማይ ደው መበሊ ብዝብል ኣብዝበርስ ዘሎ ናይ ተፈጥሮ ኣግራብ ውሽጢ ኣብ ዝተኻየደ ናይ ተኹሲ ምልውዋጥ ቁፅሮም ብዕሊ ዘይተፈለጡ ናይቲ ገዛኢ ዉድብ ወተሃደራት ከም ዝሞቱ ተገሊፁ።

     ብመሰረት ሓበሬታ ምንጭታትና ካብ 18 ክሳብ 20 ነሓሰ 2006 ዓ/ም ካብ ሸርቆሌ ጀሚሩ ክሳብ ናይ ህዳሴ ግድብ ዝስርሐሉ ዘሎ ቦታ መንነቶም ዘይተፈልጡ ዕጡቛት ንዝኸፈትዎ ተኹሲ ስዒቡ ናብ ዙርያ ህዳሴ ግድብ ሰራዊትን ኣፅዋርን እናተጎዓዓዘ ምዃኑ ድሕሪ ምግላፅ ብ25 ነሓሰ 2006 ዓ/ም ልዕሊ 20 ኦራል ዝዓይነተን ወተሃደራዊ መኻይን ዝተፈላለየ ኣፅዋራት ፅዒነን ከም ዝኣተዋ ንምፍላጥ ተኻኢሉ።

     ኣብ’ቲ ቦታ ብመዓልታዊ ስራሕ ዝተዋፈሩ ወገናት ነቲ ቦታ ብህፁፅ ገዲፎም ከም ዝወፁን እቲ ስራሕ‘ውን ንግዚኡ ደው ኢሉ ከም ዘሎን ኣብቲ ከባቢ ካብ ዝርከቡ ኣባላት ምክልኻል ሰራዊት ልሒኹ ዝወፀ ሓበሬታ የመላኽት።

   ካብቲ ክልል እንተይወፃና ኣብ ዞባ ከማሽ ወረዳ ሶጌ ዝርከቡ ኣባላት ኣመራርሓ ናይቲ ገዛኢ ዉድብ ምስ ህዝቦም ኮይኖም ናይ ገዛእ ርእሶም ሰንደቕ ብምድላውን ብምስቃልን ፍሉይ ፌስቲቫል ብምግባር ካብ ናይ ክልልና ተወለድቲ ወፃኢ ዝኾኑ ተወለድቲ ኦሮሞን ኣምሓራን ኣየመሓድሩናን ብምባል ቃለ መሓላ ብምፍፃም ንናይ ኦሮሞ ሽናሻ ብሄረሰባት ካብቲ ወረዳ ከም ዘውፅእዎም ተፈሊጡ።

    እቲ ሓበሬታ ወሲኹ ከም ዝገለፆ እዚ ተግባር እዚ ሃገርና ኢትዮጵያ ዝነበራ ምስሊ ኣስኢኑ ዝበታትን ኮይኑ ዉድብ ኢህወዴግ ዕድመ ስልጣኑ ንምንዋሕ ውሽጢ ውሽጢ ባዕሉ ዝፍፅሞ ዘሎ  እከይ ተግባር ምዃኑ ግዱሳት ዜጋታት ብምረት ይዛረቡሉ ከም ዘለው ንምፋላጥ ተኻኢሉ ኣሎ።