ዉልቃዊ ስርሖም ንምስላጥ ናብ ከባቢ ሩባ መረብ ዝተንቀሳቐሱ መናእሰይ ምስ ተቓወምቲ ትራኸቡ ኣለኹም እናተበሃሉ ይእሰሩ ከም ዘለዉ ተሓቢሩ።

ብመሰረት ሓበሬታ ምንጭታትና ኣብ ዞባ ሰሜናዊ ምዕራብ ትግራይ ወረዳ መደባይ ዛና ዝርከብ ሕብረተሰብ ማሕበራዊ መነባብርኡ ንምምራሕ ዘድልይዎ ንጥፈታት ንምፍፃም ናብ ከባቢ ሩባ መረብ ከይንቀሳቐስ ተኸልኪሉ ከም ዘሎ ድሕሪ ምግላፅ ከም ዉፅኢቱ ከኣ ነበርቲ እታ ወረዳ ዝኾኑ 19 መናእሰይ ብ1 መስከረም 2007 ዓ.ም ለኻ ከምፅኡ ናብ ሩባ መረብ ኣብ ዝኸድሉ ንስኹም ዕጥቃዊ ቃልሲ ምስ ዘካይዱ ዉድባት ክትረኸቡ ኢኹም ከይድኩም ብዝብል ምኽንያት ኣብ ከተማ ሰለኽለኻ ተኣሲሮም ከም ዝርከቡ ኣረዲኡ።

ካብ’ቶም ተኣሲሮም ዘለዉ መናእሰይ ናይ ዝተወሰኑ ኣሽማት ንምጥቃስ 1. ኤፍሬም ቀጭኑ 2. ምስግና መዓሾ 3. ሓሰን ዑስማን 4. ቴድሮስ ኣማረን ዝበሃሉ ከም ዝርከብዎም ድሕሪ ምጥቃስ ቤተሰቦም ከይሓትዎም ብፍሉይ ሒዘሞም ከም ዝርከቡ ኣገንዚቡ።