ህዝቢ ከተማ ወልቅጤ ብሕፅረት ፅሩይ ዝስተ ማይን ካልኦት ማሕበራዊ ፀገማትን ይሳቐ ከም ዘሎ ምንጭታትና ሓቢሮም።

ምንጭታትና ካብ’ታ ከተማ ከም ዝገለፅዎ፣ ኣብ ክልል ደቡብ  እትርከብ ከተማ ወልቅጤ ካብ ዝሓለፈ ወርሒ ሕዳር ጀሚሩ ፅሩይ ዝስተ ማይ ጠቕሊሉ ከም ዝጠፍአ ድሕሪ ምግላፅ ነበርቲ እዛ ከተማ ብተደጋጋሚ ጥርዓኖም ብፅሑፍ ናብ ቤት ማዘጋጃ እታ ከተማ ዋላ’ኳ እንተቕረቡ ክሳብ ሕዚ ፍታሕ ዝህብ ኣካል ብምስኣኖም ንልዕሊ ወርሒ ብስእነት ማይ ይሳቐዩ ከም ዘለዉ ተፈሊጡ።

   ነዚ ፀገም ፍታሕ ዝህቦ ዝሰአነ ህዝቢ ከተማ ወልቂጤ ድማ ገንዘብ እናዋፀአ ባዕሉ ናይ ሃፋትም መካይን ብምክራይ ኣስታት 100 ኪ/ሜትር ዝኸውን ርሕቐት እናተጎዓዘ ካብ ወረዳ ስልኪ-ኣምባን ከተማ ወሊሶን  ማይ ንከምፅእ ይግደድ ከም ዘሎ ንምፍላጥ ተኻኢሉ።

   ኣብ መወዳእታ እቲ ሓበሬታ ነበርቲ እቲ ከተማ ነቲ ተፈጢሩ ዘሎ ስእነት ማይ ካልኦት ፀገማት ማሕበራዊ ኣገልግሎትን ንክፈትሐሎም ዝዓለመ ሰለማዊ ሰልፊ  ንምግባር ይዳለው ምህላዉ ኣረዲኡ።