ኣብ ከተማ ጎንደር ዝርከቡ ፖላዊስ ብእሱር ንዝሓዝዎም ሰባት ክሃድሙ ፈቲኖም ብምባል ብጥይት ይቐትልዎም ከም ዘለዉ ተገሊፁ።

ኣብ’ታ ከተማ ዘለዉ ምንጭታትና ዝለኣኽዎ ሓበሬታ ከም ዘመላኽቶ ኣብ ከተማ ጎንደር ቀበሌ 05 ኣብ ዝርከብ ፖሊስ ጣብያ ተኣሲሩ ንዝነበረ ነጋሲ ገብረኣብዝጊ ዝተብሃለ ተወላዲ ትግራይ ዝኾነ ዜጋ ብ23 ታሕሳስ 2007 ዓ.ም ቤተሰቡ ክርእይዎ ኣብ ዝኸድሉ ንኽራኸብ ፈቂደምሉ ከብቅዑ ይሃድም ኣሎ ብዝብል ረዳት ኢንስፔክተር ተሾመ ምላቱ ዝተበሃለ ዕሱብ ብጥይት ተኲሱ ከም ዝቐተሎ ተፈሊጡ።

     እቲ ሓበሬታ ወሲኹ ከም ዘረድኦ እቶም ኩነታቱ ክሓትዎ ዝኸዱ ቤተሰቡ ኣብ ቅድሚ ዓይኖም ሓዎም በቲ በዓል ስልጣን ፖሊስ ምስ ተቐተለ ኣዚዮም ከም ዝተዳናገፁ ድሕሪ ምግላፅ ይምልከቶ ናብ ዝበልዎ ኣካል ቀሪቦም ቀታሊ ሓዎም ተታሒዙ ክሕተተሎም ኣብ ዝጠርዑሉ ዘዕግብ ምላሽ ከም ዘይተዋህቦምን እቲ ገበነኛ ፖሊስ ኣብ ቁፅፅር ከም ዘይወዓለን ንምፍላጥ ተኻኢሉ።