ኣብ ወረዳ ፀገዴ ዝርከቡ ሸፋቱ ኣብቲ ከባቢ ንዝንቀሳቐሱ ፍሉያት ሓይሊ ናይ’ቲ ስርዓት ኣድብዮም ብምፅናሕ ይቐትልዎም ከም ዘለዉ ምንጭታትና ዝለኣኽዎ ሓበሬታ ኣመልኪቱ።

    ብመሰረት’ሓበሬታ ምንጭታትና ኣብ ዞባ ምዕራብ ትግራይ  ወረዳ ፀገዴ ዝርከቡ ኣባላት ምልሻ ኣብ ልዕሊ ፉሉያት ሓይሊ እቲ ስርዓት መጥቃዕቲ የውርዱ ምህላዎም ድሕሪ ምግላፅ ካብኣቶም ሞላ ተስፋይ ዝተበሃለ ሽፍታ  ምስ ዓሰርተ ርእሱ ኣብ  መንጎ ማይ ደልየን  ሰረቛን ኣብ ዝተብሃለ ከባቢ ኣድብዩም ብምፅናሕ ሓሙሽተ ከም ዝቐተሉ ተፈሊጡ።

    ኣብቲ መጥቃዕቲ ካብ ዝተቐትሉ ኣባላት ፍሉይ ሓይሊ ገለ ኣስማት ንምጥቃስ፦ታከሊ ኣባተ፤ ኣለበል ኪዳነን ካልኦትን ምዃኖም ዝገለፀ እቲ ሓበሬታ እቶም ምልሻ ነዚ ስጉምቲ ክወስዱ ዘገደዶም ቀንዲ ምኽንያት በቶም ዕጡቛት ኣብ ልዕሊ ህዝቢ ክወርድ ዝፀንሐ ግፍዕታት ካብ እዋን ናብ እዋን እናበኣሰ ምኻዱ ስለ ዘይተዋሕጠሎም ነቲ ስጉምቲ ክወስድዎ ከም ዝተገደዱ ገለ ተዓዘብቲ ካብቲ ከባቢ ይገልፁ።