ኣብ ክልላት ዓፋርን ሶማልን ከሳሓሕባ ዝፀንሓ 3ተ ከተማታት ናብ ዓፋር ክኾና እቲ ስርዓት ስለ ዝወሰነ ከም ሰዓቤኑ ድማ ኣብ መንጎ ክልቲኡ ህዝብታት ሓያል ግጭት ከም ዝተወልዐ ተገሊፁ።

  ኣብ መንጎ ክልላት ዓፋርን ሶማልን ዘዋስን መሬት ብዘይምንፃሩ ንዜጋታት ከቃትል ከም ዝፀንሐ ዝገለፀ እቲ ሓበሬታ እቲ ስርዓት ስቕ ኢሉ ክዕዘቦም ፀኒሑ ኣብ’ዚ ቀረባ እዋን ግን ክፈትሖ እየ ብዝብል፤ ሰለስቲኤን ከተማታት ናብ ክልል ዓፋር ኣብ ዝወሰነሉ ብህዝቢ ክልል ሶማል ተቐባልነት ስለ ዘይረኸበ ኣብ መንጎ ክልቲኡ ህዝቢ ቡርቱዕ ደም ምፍሳስ ኣኸቲሉ ምህላዉ ተገሊፁ።

  እቲ ብ5^ተ ታሕሳስ 2007 ዓ/ም ኣብ መንጎ ክልቲኡ ህዝቢ ሙሉእ መዓልቲ ክካየድ ዝዉዓለ ብተኹሲ ዝተደገፈ ግጭት ብርክት ዝበሉ ዜጋታት ህይወቶም ዝሰኣኑን ዝቖሰሉን እንትኾኑ፤ እዚ ዘስካሕክሕ ደም ምፍሳስ እዚ ድማ ዉፅኢት ዝንቡዕ ዉሳነ እቲ ስርዓት ስለ ዝኾነ፤ ምሉእ ብምሉእ ተሓታቲ ስርዓት ኢህወደግ ምዃኑ  ወገናት ኣብ ምግላፅ ከም ዝርከቡ ተፈሊጡ።