ኣብ ትግራይን ዓፋርን ተፈጢሩ ዝነበረ ግጭት ኣብ እዋኑ ፍታሕ ብዘይምርካቡ ቅሬታ ሒዙ ዝፀነሐ ህዝቢ ኣብ ትሕቲ ኢህወዴግ ፍትሓዊ መረፃ የለን ብምባል ነቲ ዝካየድ ዘሎ ምዝገባ መረፃ ከም ዝነፀጎ ተገሊፁ።

ብመሰረት ሓበሬታ ምንጭታትና ኣብ ሞንጎ ነባሪ ህዝቢ ዉህደትን እሰትን ተባሂለን ኣብ ዝፅዉዓ ጣብያታት ትግራይን ዓፋርን ኣብ ዝሓለፈ ወርሒ መስከረም ተፈጢሩ ብዝነበረ ግጭት ኣብ ስልጣን ዘሎ ገዛኢ ስርዓት ቆላሕታ ስለ ዘይገበረሉ ልዕሊ 10 ንፁሃት ሰባት ዝተቐተሉ እንትኾኑ ሕዚ ብካድረታት እቲ ስርዓት ንመረፃ ተመዝገቡ፤ ካርድ ዉሰዱ ምስ ተብሃሉ ኣብ ትሕቲ ኢህወዴግ ሕጋዊ መረፃ ስለ ዘየለ ንመን ክንመርፅ ኢና ንምዝገብ ብምባል ከም ዝነፀግዎ ተሓቢሩ።

   ብፍላይ ብተሪር ምላሽ ተቓዉሞ እቲ ሕብረተሰብ ዝቐሓሩ ኣመሓደርቲ ክልል ትግራይ ንነባሪ ህዝቢ ወረዳ ኣፅቢ ወንበርታ ጣብያ ዉህደት ሕዚ መዓልታዊ ኣኼባ እናበሉ ካብ ዕለታዊ ስራሕቱ ነፂለሞ ከም ዝርከቡ ዝገለፀ እቲ ሓበሬታ እንተኾነ እቲ ህዝቢ ንሕና ሎሚ ይኹን ፅባሕ ዉሕስነት ንዘይህበና ዉድብ ኣይንመርፅን ካብኡ ወፃኢ ድማ ክንመርፅ ዕድል ስለ ዘየለ ኣይንምዝገብን ብምባል ነቲ ጎስጓሳዊ ኣኼባ ምሉእ ብምሉእ ነፂገሞ ከም ዘለዉ ኣገንዚቡ።