ኣብ ደቡብ ወሎ ወረዳ ወረኢሉ ኣብ ዝተብሃለ ከባቢ ነበርቲ ዝኾኑ ወገናት መሬቶም ካብ ኣግባብ ወፃኢ ስለ ዝተመንጠሉ ናይቲ ወረዳ ኣምሓዳሪ ገዛ ኣቃፂሎም ከም ዝተሰወሩ ተፈሊጡ።

    ኣብ ክልል ኣምሓራ ደቡብ ወሎ ወረዳ ወረኢሉ ቱሉ ኣብ ዝተብሃለ ቦታ ነበርቲ ዝኾኑ ኣንተነህ ከተማን ስዒድ ከተማን ዝተብሃሉ ኣሕዋት ብሕጋዊ መንገዲ ተዋሂብዎም ግብሪ ክኸፍልሉ ዝፀንሑ መሬቶም ካብ ኣግባብ ወፃኢ ብኣምሓደርቲ ናይ’ታ ወረዳ ስለ ዝተመንጠሉ ነቲ ኣቦ ወንበር ወረዳ ዝኾነ ካድረ እቲ ስርዓት ገዝኡ ምስ ምሉእ ንብረቱ ብምቅፃል ካብቲ ከባቢ ምስዋሮም ክፍለጥ ተኻኢሉ።

    እቶም ነበርቲ ቱሉ ዝኾኑ 2^ተ ወገናት መሬትና ይመለሰልና ኢሎም ኣብ ዝሓተትሉ እዋን ን15 መዓልትታ ከም ዝተኣሰሩ ድሕሪ ምግላፅ ንሕቶኦም ጉቡእ ምላሽ ዝህብ ስለ ዝሰኣኑን ፍትሒ ምጉዳሉ ዘማመረሮም እዞም ወገናት ምሉእ ንብረቶም ሸይጦም ኣብ ልዕሊ ንብረት እቲ ኣምሓዳሪ ናይ ምቅፃል ስጉምቲ ወሲዶም ካብቲ ከባቢ ምስዋር ከም መማረፂ ዝወሰድዎ ምኳኑ  ንነበርቲ መሰረት ገይሩ ዝበፀሓና ሓበሬታ ኣረዲኡ።