ኣመሓደርቲ ወረዳታት ትግራይ ብሽም ህዝቢ ካብ ገብረቲ ሰናይ ትካላት ዝተረኸበ ሓገዝ ኣብ ዉልቃዊ ረብሕኦም የዉዕልዎ ከም ዘለዉ ተሓቢሩ፣

ኣብ ዞባ ማእከል ትግራይ ወረዳ ናዕዴር-ዓዴት ዋና ኣመሓዳሪ ኣበበ ተሾመ ዝተበሃለ ኣብታ ወረዳ ንዝርከቡ ፀገም መነባብሮ ዘለዎም ስድራቤታት ሓገዝ ክዉዕል ተባሂሉ ካብ ገበርቲ ሰናይ ትካላትን ለገስቲ ሃገራትን ካብ ዝተረከቦ ዉሽጢ እቲ 90 ኲንታል ፋፋን ልዕሊ 200 ጀረካን ዘይቲ ብልዕን ምስ ኮሚቴ መሳርሕቱ ኮይኑ ኣብዚ ቅንያት ሸይጡ ከም ዝበለዖ ተፈሊጡ፣

ነቲ ግዕዙይ ተግባር በዓል ስልጣን ስርዓት ወያነ ዘስተባሃለ ሕብረተሰብ እታ ወረዳ ይምልከቶም ናብ ዝበሃሉ ኣካላት ብወከልቱ ኣቢሉ ጥርዓኑ ምስ ኣቕረበ። ንኸምስሉ ንግዝኡ ኣብ ቁፅፅር ፖሊስ ክዉዕል ጌሮም እኳ እንተነበሩ። ብዛዕባ እቲ ዝፈፀሞ ገበን ክሲ ከይተመስረተሉን ዝኾነ ይኹን ምፅራይ ከይተገብረሉን  ኣመሓደርቲ ናይቲ ዞባ ነቲ ግዕዙይ ምሕደረኦም ዘተባብዕ ብዘይሓላፍነታዊ ስርሖም ካብቲ ንግዚኡ ተኣሲርሉ ዝነበረ ክልቀቕ ከም ዝገበሩ ካብ ከተማ ኣኽሱም ዝበፀሓና ሓበሬታ ወሲኹ ኣረዲኡ፣