ኣብ ወልቃይት ንዝርከብ ፋብሪካ ሽኮር መሳለጢ ስራሕ ተባሂሉ ዝለኣኽ ንብረት ብሓለፍቲ‘ቲ ትካል ይጠፋፍእ ምህላዉ ካብቲ ከባቢ ዝተረኸበ ሓበሬታ ኣመልኪቱ፣

ኣብ ዞባ ምዕራብ ትግራይ ወረዳ ወልቃይት ይስራሕ ንዘሎ  ፋብሪካ ሽኮር መሳለጢ ክውዕል ተሓሲቡ ዝተልኣኸ ነዳዲ 21 ጥቅምቲ 2006 ዓ/ም ምክትል ስራሕ መካየዲ ናይቲ ትካል  ሸይጡ ንውልቃዊ ጥቕሙ ከም ዘውዐሎ  ድሕሪ ምግላፅ። ሓላፊ ንብረት ናይ’ቲ ፕሮጀክት ስለምንታይ ይሽየጥ ስለ ዝበለ ጥራሕ ካብ ስርሑ ክባረር ከም ዝገበሮ እቲ ዝበፀሓና ሓበሬታ አረዲኡ።

     እቲ ብኮድ ኢት-3 _08956 እትፍለጥ ነዳዲ ዝፀዓነት ቦጥ ኣብ ወልቃይት ንዝህነፅ ዘሎ ፋብሪካ ሽኮር መስርሒ ክውዕል ተሓሲቡ ዝተለኣኸ ነዳዲ ሓለፊ ናይ’ቲ ትካል ምስ ገለ ነጋዶ ተመሻጢሩ ነቲ ነዳዲ ኣየር ብኣየር ምስሸጦ። ነቲ ዘይሓላፍነታዊ ስራሕ ዝተቓወሙ ሓላፊ ንብረት ክፍሊ ናይ’ቲ ትካል ኣይተ ኣለማዮህ ሃይለ ብዘይ ቅድመ ኩነት ካብ ስረሑ ክባረር ከም ዝተገበረ ንምፍላጥ ተኻኢሉ።

ብተመሳሳሊ ቅድም ክብል ነቲ ፕሮጀክት መህነፂ ክዉዕል ተባሂሉ ብዓበይቲ መካይን ተፃዒኑ በብእዋኑ ዝተለኣኸ ሲሚንቶን ቴንዲኖን ነዳዲን ኣብ ከባብታት ሽረን ባህርዳን ሓለፍቲ እቲ ትካል ብኣቋራጭ ክሸጥዎ ኢድ ብኢድ ብብምትሕብባር ህዝቢ ተታሒዞም ከብቅዑ ጉዳዮም ከይተፃረየ ከም ዝተለቁ ኣብ ዝሓለፈ ዜናታትና ገሊፅና  ምንባርና ይዝከር፣