ኣብ ከተማ ኣምቦ ኣብ ዝተኻየደ ተቓዉሞ ንህዝቢ ኣለዓዒልኩም ብዝብል ብ27 ግንቦት 2006 ዓ/ም ብሓይልታት ፀጥታ ኢህወዴግ ተጨዉዮም ዝተወሰዱ ዜጋታት ንሞትን ስቅያትን ተቓሊዖም ከም ዘለዉ ተፈሊጡ።

ብመሰረት ሓበሬታ ምንጭታትና ነበርቲ  ከተማ ኣምቦ ዝኾኑ ብዙሓት ንፁሃት ወገናትና ኣብቲ ናይ ዝሓለፈ ኣንፃር እቲ ስርዓት ዘቕነዐ ተቓውሞ ህዝቢ ኣለዓዕሊኩም ተባሂሎም 150 ሰባት ተጨውዮም ከም ዝተወሰዱን ካብኣቶም ዉሽጢ 17 ሰባት ከም ዝሞቱ ድሕሪ ምግላፅ እቶም ዝተረፉ ድማ ኣብ ደብረዘይቲ  ፍሉይ ሽሙ ቢሸፍቱ ኣብ ዝተብሃለ ቦታ ተኣሲሮም ከም ዘለውን ወለዶም ይኹኑ ካልኦት ሰባት ክሪእዎም ፍቑድ ከም ዘይኮነ ገለ ውሽጢ ፈለጥቲ ይገልፁ።  

   ብተመሳሳሊ ኣብ ክልል ኦሮምያ፤ ከተማ ግምቢ፤ መጪ መንደር ኣብ ዝተባሃለ ከባቢ ኣብ ዝሓለፈ ግዜ ኣብ ዝተኻየደ ተቓውም ተሳቲፍኩምን ኣለዓዒልኩምን ብዝብል ብ7 ግንቦት 2006 ዓ/ም ብልኡኻት ናይቲ ገዛኢ ስርዓት ሃኒ መልኣኩ ትርከቦም 35 ንፁሃት ወገናት ጨውዮም ከም ዝወሰድዎምን ክሳብ ሐዚ ኣበይ ከም ዝኣተው ወለዶም ይኹኑ ዝኾነ ሰብ ዝፈለጥ ከም ዘየሎ ድሕሪ ምግላፅ ብሓፈሻ ድማ ኣብቲ ከባቢ ዝርከብ ህዝቢ ድማ ሓያለ መግረፍትን ምፍርራሕን ይበፅሖ ከም ዘሎ ተፈሊጡ።