ንዝቕፅል 7 ዓመት ኣብ ምክልኻል ንምግልጋል ኣይንፍርም ብምባሎም ዝተሰናበቱ ኣባላት ማእከላይ እዚ ዝኾኑ ወተሃደራት መሳፈሪ መኪና ስኢኖም ፈቐዶ ከተማታት እናተንከራተቱ ከም ዝርከቡ ተሓቢሩ።

እቶም ስሩዕ ኣገልግሎቶም ወዲኦም ንተወሳኺ 7 ዓመት ክፍርሙ ተሓቲቶም ኣይንቕበሎን ብምባል ስንብታ ዝሓተቱ ወተሃደራት ኣባላት ማእኸላይ እዚ ብቑፅሮም ብርክት ዝበሉ እኳ እንተኾኑ ላዕለዎት ሓለፍቲ ሰራዊት እቲ እዚ ግና ንሕቶኦም መሊስና ንመበሊ 1,600 ንዝኾኑ ወተሃደራት ጥራይ ስንብታ ሂቦም ብዘይ ገለ ትሕጋግን መሳፈሪ መኪናን ሰለ ዘፋነውዎም ኣብ ዓብዪ ፀገም ብምዉዳቖም ኣብ ጎደናታት ሸራሮ፤ ሽረን ካልኦት ኣብቲ ከባቢ ዝርከባ ከተማታትን ከርተት ይብሉ ከም ዘለው ካብ ዉሽጢ እቲ ሰራዊት ልሒኹ ዝበፀሓና ሓበሬታ ገሊፁ።

እዚ ከምዚ ኢሉ እንከሎ ኣገልግሎቶም ወዲኦም ናይ ምፍናዉ ዕድል ዘይረኸቡ ወተሃደራት ከዓ መዓልታዊ ብጉጅለን ብዉልቅን ነቲ ሰራዊት ራሕርሖም እግሮም ናብ ዘምረሖም ኣብ ምጥፋእ ከም ዝርከቡ እቲ ሓበሬታ የረድእ።