ኣብ ወረዳ ጭልጋ ብዝተላዕለ ተቓውሞ ህዝቢ ሲዒቡ ልዕሊ 60 ሰባት ከም ዝተኣሰሩን ብርክት ዝበሉ’ውን በረኻ ከም ዝኣተዉን ንምፍላጥ ተኻኢሉ፣

ካብ ከተማ ጎንደር 55 ኪሎ ሜትር ርሒቓ ኣብ እትርከብ ጭልጋ ወረዳ  ቀበሌ አለምፀሃይ አመክሊን እናተባሃለ ኣብ ዝፅዋዕ ጎጥ ነበርቲ ዝኾኑ ሓረስቶት። “ መሬቶም ንናይ ውሽጢ ሃገር ሰብ ሃፍቲ ክዋሃብ እዩ” ብዝብል ካብ ቦትኦም ክላዓሉ ንዝቐረበሎም ሕቶ ብምቅዋሞም ብዕጡቛት ናይቲ ክልልን ኣባላት ፌዴራል ፖሊስን  ከባቢኦም ተኸቢቡ ተኹሲ ከም ዝተኸፈተሎም ካብ’ቲ ቦታ ዝተረኸበ ሓበሬታ ኣረዲኡ፣

   ዝሓዝናዮ መሬት ኣይንለቅቕን ዝበሉ ነበርቲ። ኩሎም ብ29 ሚያዚያ 2005 ዓ/ም ከቢድ ደብዳብ ምስ ተፈፀሞም። ከባቢ 60 ዝኾኑ ነበርቲ አይከል እናተባሃለ ኣብ ዝፅዋዕ ቤት ማሰርቲ ተኣሲሮም ከም ዝርከቡ እቲ ሓበሬታ ኣፍሊጡ፣

   ናይ ዓይኒ መሰኻኽር ከም ዝበልዎ። ብፖሊሳት ብዝበፅሖ ዘስካሕኽሕ ድብዳብ  ጉድኣት ዝወረዶ ውቤ አዛናው ዝተባሃለ ተማሃራይ ሻውዓይ ክፍሊ ናብ  ጎንደር ሆስፒታል ተወሲዱ  ሕክምና እናተኸታተለ ከም ዝርከብ ብኣብነት ተጠቒሱ ኣሎ።

   እቲ ፀገም ዝተፈጠረ ምምሕዳር እቲ ወረዳ ምስ ነበርቲ ከይተዘራረበን ከይተማኸረን። ብሃንደበት መሬቶም ከፋፊሉ ንሰብ ሃፍቲ ንምሃብ ብምብጋሱ እዩ ዝበለ እቲ ሓበሬታ። እዞም ነበርቲ ናይ’ቲ ምምሕዳር ሃንደበታዊ ስጉምቲ ብምቅዋም “ትሕዝቶና ኣይነንክእን” እንትብሉ። ሙሉእ ዕጥቂ ዝዓጠቑ ናይ ክልልን ፌዴራልን ኣባላት ፖሊስ ነቲ ከባቢ ብምኽባብ ተኹሲ ከም ዝኸፈትሎምን ከም ዝደብደብዎምን ወሲኾም ገሊፆም፣

  ካብ ዉሽጢ ዝተኣሰሩ ነበርቲ እቲ ከባቢ ብደብዳብ ፖሊስ ኣእዳዎም ዝተሰበሩ ቀሺ ተረፈ ፅጌን ርእሶም ብኻቢድ ዝተጎድኡ ቀሺ ተክሌ በላይን ዝተበሃሉ ዝርከብዎም ኮይኖም። ከምኡ’ውን አቶ ብርሃኑ ዘገዬ፤ አቶ ተገኑ ደገፋ፤መንእሰይ ደመወዝ አዳነ፤አቶ እያዩ ካሴ፤ መንእሰይ የኔሁን አበራ፤ መንእሰይ አንዳርጌ ጌጡ፤ አቶ ታደለ ዓለማየሁ፤አቶ አወቀ ቸኮል፤ መንእሰይ ባበይ አቢ፤ተማሃራይ ሙሉ አጣናው፤ አቶ አማረ ደምሴ፤ መንእሰይ ባበይ አበበ፤መንእሰይ ዓለምነህ መካሻው፤ዲያቆን ታዲዮስ ተሰማን አቶ ባዬ በላይን ከም ዝርከብዎም ካብቲ ሓበሬታ ንምርዳእ ተኻኢሉ፣

   ከም ኣገለልፃ እቲ ሓበሬታ። ክሳብ ሕዚ እቲ ከባቢ ብዑጡቓት ተከቢቡ ብምህላው ብርክት ዝበሉ መረበቶም ለቒቖም ናብ በረኻ ይሓድሙ ከም ዘለውን። ኣብ ልዕሊ እዞም ነበርቲ ተኹሲ ዝኸፈቱን ደብዳብ ዝፈፀሙን ዕጡቓት። ኣብ ልዕሊ ፀላኢ ዓወት ከም ዝዓተሩ ክፍክሩን ክስሕቑን ከም ዝተራኣዩ ድሕሪ ምግላፅ። እቲ ብጣዕሚ ዘሐዝን ነገር ድማ ከም’ዚ ብምግባሮም ነቲ ቦታ ክርከቡ እዮም ብዝተባሃሉ ብዓል ሃፍቲ ሕሩድ  ተሓሪድሎም ክጋበዙ ከም ዝተዓዘበ እቲ ዋሃቢ ሓበሬታ ኣረዲኡ፣    

   ብተመሳሳሊ ዜና ኣብ ወረዳ መተማ ከባቢ ኮኪት ቀበሌ ዝነብሩ ልዕሊ ሰለስተ ሽሕ ሓረስቶት መሬትና ኣሕሊፍና ኣይንህብን ብምባል ተቓውሞ  ከም ዘልዓሉ ነበርቲ እቲ ከባቢ እንትገልፁ። እቲ ምኽንያት ድማ ባንኪ መሬት ምስ ዝብል ኣሰራርሓን ንእንቨስተራትን እናተባሃለ ምስ ዝዋሃብ ዝተኣሳሰር ምዃኑ ገሊፆም፣