ኣብ ክልል ኣምሓራ ወረዳ እንጂ ቫራ ኣብ ልዕሊ ደቂ ኣንስትዮ ዓመፅ ዝፈፀሙ ገበነኛታት ንመርመርቲ ፖሊስ ጉቦ ከፊሎም ብዘይሓደ ምፅራይ ካብ እሱር ይልቀቑ ከም ዘለዉ ተሓቢሩ።

ዉልቃዊ ስምዒቱ ንምርዋይ ቦታን ግዜን መሪፁ ንሓንቲ ጓል ዓሚፁ ሕጋ ዘፍረሰ መኮንንት ዓሊ ዝተበሃለ ሰብ፣ ብዘለዎ ሃፍቲ ተመኪሑ ዝፈፀሞ ከቢድ ገበን ብእዋኑ ተፃርዩ ናብ ዝምልከቶ ኣካል ብምቕራብ ዝግባእ ዉሳነ ክረክብ ምግባር ናይ ፖሊስ ስራሕ ሓላፍነትን እኳ እንተኾነ፤ ኣብ ወረዳ እንጂ-ቫራ ኣብ ዉልቃዊ ረብሕኦም ምኽዕባት ካብ ዝተዋፈሩ ፖሊስ ሓደ ዝኾነ መርማሪ ፖሊስ ኢንስፔክተር ኣስማማዉ ጋሻዉ ካብቲ ጥርጡር ልዕሊ 10,000 ብር ጉቦ ተቐቢሉ ብዘይሓደ ምፅራይ ካብ እሱር ከም ዝለቐቖ ካብቲ ቦታ ዝበፅሓና ሓበሬታ ኣረዲኡ።

ኣስዒቡ እቲ ሓበሬታ ኣብ ወረዳ እንጂ-ቫራ ዝርከቡ ኣካላት ፍትሒ ብፍላይ ከዓ ኣዘዝትን መርመርትን ፖሊስ ኩሉ ስራሕቶም ኣብ ጉቦ ሂብካ ኣገልግሎት ምርካብ ኣብ ዝብል ዝተመርኮሰ ከም ዝኾነን፤ መኽፈሊ ጉቦ ዘይብሎምን ጉቦ ክህቡ ፍቓደኛታት ዘይኮኑ ኣካላት ሕብረትሰብ ግና ይተኣጓጎሉን ሓቂ ሒዞም ብዘይሓደ ፍታሕ ግዚኦም ላዕሊ ታሕቲ ኣብ ምባል ክሕልፍዎ ይግደዱ ከም ዘለው የረድእ።