ኣብ ክልል ኣምሓራ ዞባ ኣዊ ወረዳ ዚገም ዝርከቡ ኣማሓዳርቲ ንመሰረት ልምዓት ክውዕል ተበሂሉ ካብ ህዝቢ ዝተኣከበ ገንዘብ ንውልቃዊ ረብሓኦም የውዕልዎ ምህላዎም ተሓቢሩ።

እቶም ናይ’ቲ ወረዳ ነበርቲ ንመሰረት ልምዓት ክዉዕል ተባሂሉ ዘዋፅእዎ  ኣስታት 900 ሽሕ ብር  ነቲ ዝተሓሰብሉ መዓላ እንከይወዓለ ኣመራርሓን ካድረታትን ወረዳ ዚገም ተኻፊሎም ስለ ዝበልዕዎ ነባራይ ህዝቢ ኣብ ልዕልኦም ስጉምቲ ንኽዉሰድ ዘልዓሎ ሕቶ ሰማዒ ከም ዘይረኸበ ንምፍላጥ ተኻኢሉ።

እቲ ዝተዋፀአ ልዕሊ 900 ሽሕ ገንዘብ ህዝቢ ኣብተን ገጠራት ንዘሎ ፀገም መብራሕቲ ንምቕላል ብሶላር ዝሰርሕ መብራሕቲ ንምትካል  ብዝብል ብኣይተ ኣዲሱ ብርሃኑ ዝተብሃለ በዓል ስልጣን ከም እተኣከበ ዝገለፀ እቲ ሓበሬታ እንተኾነ ኣይተ ብርሃኑ ዝኣተዎ ቃል ንጎኒ ገዲፉ ነቲ ገንዘብ ህዝቢ ምስ መሻርሕቱ ኮይኑ ኣብ ውልቃዊ መናባብሮኡ ከም ዘውዓሎ ተገሊፁ።

ገንዘቦም ዝተበልዖም ነበርቲ እታ ወረዳ  ፍታሕ ንምርካብ ናብ  ኣዛዚ ፖሊስ እቲ ወረዳ ኤንስፐክተር ኣስፋው ኣጥናፉን ከም’ዉን ናብቲ ከባቢ ዝርከብ  ቤት ፍርዲ ብምኻድ ዘቕረብዎ ጥርዓን  ውፅኢት ክረኽብሉስ ይትረፍ እቶም ጥርዓን ሰማዕቲ ኣካላት ኣብቲ ምጥፍፋእ ኢድ ኣታውነት ስለዘለዎም ነቲ ገበን  ብምሽፍፋፍን ነቲ ጥርዓን  ግቡእ ምላሽ ክህብሉ ከም ዘይከኣሉ ኣረዲኡ።