ኣብ ወረዳ ናዕዴር ዓዴት ዝነብር ሕብረተሰብ ንኩንታል መደባርያ ብ1,300 ብር ክገዝእ ይግደድ ከም ዘሎን ንዝኣበየ ድማ ረዲኤት ኣይትወሃብን እናተባህለ ይፈራራሕ ምህላዉ ተሓቢሩ፣፣

ብመሰረት ሓበሬታ ምንጭታትና  ኣብ ወረዳ ናዕዴር ዓዴት ጣብያ ኣበባ የዉሃንስ ዝነብር ህዝብና ዓቕሚ ይሃልዎ ኣይሃልዎ ብዘየገድስ ብ1,300 ብር መደባርያ ክገዝእ ዓቅሚ የብለይን ኣይዕድግን ዝበለ ድማ ረዲኤትን ካልኦት ጥቕማ ጥቕምን ኣይወሃበካን እናተብሃለ በቶም ናይ’ታ ጣብያ ኣምሓደርቲ ተኽለ ሞጎስን መሳርሕቱን ብምዃን የፋራርሕዎም ከም ዘለዉ ንምፍላጥ ተኻኢሉ፣፣

ኣስዒቡ እቲ ሓበሬታ ንፅጉማት ሕብረተሰብ እታ ወረዳ ተባሂሉ ዝመፅእ ናይ ረዲኤት እኽልን ካልእን ናብ ኢድ ፅጉማት ከይበፅሐ በቶም ኣምሓደርቲ ይጠፋፋእን ብወገንነት ንቤተሰቦም ይወሃብን  ምህላዉ የረድእ፣፣

ኣብ’ዚ ቀረባ እዋን ብዋና ኣመሓዳሪ እታ ወረዳ ገርላሰ ገብሩን ሓላፊ ፀጥታ ናይ’ታ ወረዳ ደስታ ገብረሃወርያን ኣብ ዝተመረሐ ኣኼባ ዝተረኸበ ህዝቢ ገርላሰ ገብሩ ብሓገዝ ንህዝቢ ተባሂሉ ዝመፀ እኽሊ ብተደጋጋሚ ዘጠፋፍእን ብብልሽዉና ዝጠልቀየን ስለ ዝኾነ ኣየመሓድረናን ካብ ስልጣኑ ይውረድ ዝብሉን ካልኦትን ሕቶታትን  ክሳብ ዞባ ከም ዘሰምዐ ንምፍላጥ ተኻኢሉ፣፣

ኣብ መወዳእታ እቲ ኣየምሓድረናን ተባሂሉ ብህዝቢ ዝተነፅገ በዓል ስልጣን እቲ ፈፂምዎ ዝተበሃለ ግዕዙይ ኣሰራርሓ ምስ ላዕለዎት ሓለፈቱ ተሻሪኹ ስለ ዝገበሮ ሕዚ’ውን ኣብ ስልጣኑ ይቐፅል ምህላዉ ዝተዓዘበ ሕብረተሰብ መረረቱ ኣብ ምግላፅ ከም ዝርከብ እቲ ሓበሬታ ወሲኹ ኣረዲኡ፣፣