ኣብ ከተማ ኣዲስ ኣበባ ናይ ኮንደሚኒም ኣብይቲ ካብ ሕጊ ወፃኢ ኣምሓላሊፍኩምን ናይ ሊዝ መሬት ንዉልቃዊ ጥቕምኹም ኣዉዒልኩም ብዝብል ምኽንያት ብርክት ዝበሉ ወገናት ከም ዝተኣሰሩ ተፈሊጡ።

ኣብ ከተማ ኣዲስ ኣበባ  ቢሮ ልምዓት ምምሕዳር መሬት  ኣብ ልምዓት ኣባይቲ ኤጀንሲን ኣብ ዝተፈላለዩ ክፍለ ከተማታት ናይ መሬት ልምዓት ቤት ፅሕፈት ሓለፍቲ ኮይኖም ክሰርሑ ዝፀንሑ ወገናት፣ ናይ ኮንደሚኒየም ኣባይቲ ካብ ሕጊ ወፃኢ ንዘይተመዝገቡ ዕጫ ንዘይወፅኣሎም ዉልቀ ሰባት ሂብኩም ኢኹም ብዝብል፣ እቲ ስርዓት ካብ ናይ ስራሕ ቦትኦም ከባርሮም ስለ ዝደለየ ንጨረታ ዝወፀ ናይ ሊዝ መሬት ከይተወዳደሩ ዝሰዓሩ ብምምሳል፣ ኣብ ዉልቀ ጥቕሞም ኣዉዒሎሞ ብምባል፣ መርትዖ ብዘየብሉ ዝተጠርጠሩ ሰብ ሞያን ነጋዶን ምእሳሮም ንምፍላጥ ተኻኢሉ።

እቶም ምንም መርትዖ ዘይተረኽቦም ብጥርጣረ ጥራሕ ዝተኣሰሩ ወገናት፣    ተስፋሚካኤል ገብረማርያም፣ ጌታቸው ተመስገን፣ ዳንኤል ምንዳሴልን ይድነቃቸው ሮሪሳን ኮይኖም፣ ኣብ'ቲ ምምሕዳር ኣብ ዝተፈላለዩ ናይ ስራሕ ጨንፈራት ሰብ ሞያ እንትኾኑ፣ አቶ ሱራፌል ልሳኑ፣ ብርሃኑ ማሞን አንገሶም ገብረ ሩፋኤልን ድማ ነጋዶ ከም ዝኾኑ ተገሊፁ።

እቲ ዝረኸብናዮ ሓበሬታ ከም ዘረድኦ፣ ብጀካ እዞም ተኣሲሮም ዘለዉ ካልኦት ተጠርጠርቲ ኣለዉ ብምባል ነቶም ተኣሲሮም ዘለዉ ካልኦት መሳርሕቲ ኣለዉኹም ብምባል፣ ተዛረቡ እናተብሃሉ ከቢድ መግረፍቲ ይበፅሖም ከም ዘሎ ኣረዲኡ።