ብ6 ነሓሰ 2005 ዓ/ም ሓንቲ ቮልቮ ዝዓይነታ ዋንነታ ናይ ምክልኻል መኪና ንሰራዊት ተባሂሉ ዝተመደበ ሕሩጭ ኣብ ከተማ ማይጨው ክሽየጥ ከም ዘራገፈቶ ካብቲ ቦታ ዝበፀሐና ሓበሬታ ኣመልኪቱ።

እታ ናይ ሰራዊት ምክልኻል ሕሩጭ ፂዒና ኣብ ምጉዕዓዝ ዝነበረት ቮልቮ ዝዓይነታ መኪና ኣብ ዞባ ደቡብ ከተማ ማይ-ጨው ኣብ ዝርከብ እንዳ ገብረመድህን ኣሰፋ ዝተበሃለ በዓል ሃፍቲ መኽዘን ኣብ ምርጋፍ እንከላ ፖሊስ ዝራኣያ እኳ እንተኾነ ስጉምቲ ክወስድ ከም ዘይካኣለ ካብ’ታ ከተማ ዝረኸብናዮ ሓበሬታ ኣረዲኡ።

  ነቲ ካብታ መኪና ዝወርድ ዝነበረ ሕሩጭ ኣብ ምርጋፍ ዝነበሩ መናእሰይ ነቶም ፖሊስ ምስ ረኣዩ 25 ኩንታል ምስ ኣዉረዱ ገዲፎም ከም ዝሃደሙን። እቲ ምስ ኣዘዝቲ ሰራዊትን መራሕቲ መኪናን ተመሻጢሩ በኣቋራጭ ሃፍቲ ህዝብን ሃገርን ኣብ ምኽዕባት ዝርከብ ወናኒ መኽዘን ክሳብ ሕዚ ዝኾነ ሕቶ ከም ዘይቀረበሉን ነታ መኪና ዝመርሕ ዝነበረ ውልቀ ሰብ‘ውን እንተኾነ ክሳብ ሕዚ ኣብ ከመይ ኩነታት ከም ዝርከብ ዝተፍለጥ ጉዳይ ከም ዘየለ እቲ ሓበሬታ ወሲኹ ገሊፁ።     

   ብተመሳሳሊ ክሳብ ሕዚ እቶም ተመሻጥሮም ኣብ ስርቂ ተዋፊሮም ዝነበሩ ሰባት ኣብ ቁፅፅር ፖሊስ ዘይምዉዓሎም ኢድ ፖሊስ እታ ከተማ ከም ዘለው ዘገንዝብ ከም ዝኾነ ገለ ተዓዘብቲ ወገንናት  ካብቲ ከባቢ ኣብ ምግላፅ ይርከቡ።