ነበርቲ ከተማ ሑመራን ገጠራት እታ ከተማን ብኣማሓደርቲ እናተገደዱ ንልዕሊ ክልተ ሰሙን ኣብ ተኸታታሊ ኣኼባ ስለ ዝተፀመዱ ምረቶም የገልፁ ከም ዘለው ምንጭታትና ኣረዲኦም።

እዞም ኣብ ዞባ ምዕራብ ትግራይ ከተማ ሑመራን ገጠራት እቲ ከባብን ዝነብሩ ወገናት ኣብ እዋን ዘርእን ክራማትን ስራሖም ከየሳልጡ ብኣማሓደርቲ ወያነ ኢህወዴግ ንልዕሊ ክልተ ሰሙን  ኣብ ተኸታታሊ ኣኼባ ብሰንኪ ኮፍ ምባሎም  ናይ ሕርሻ መሬቶም ሓሪሶም  ክዘርኡ ስለ ዘይከኣሉ ንቐፃሊ ዓመት ግዳይ ጥሜትን ድኽነትን  ከይኾኑ ስግኣቶም ይገልፁ ምህላዎም ንምፍላጥ ተኻኢሉ።

   እቲ ሓበሬታ ኣስዒቡ ኣጀንዳ እቲ ኣኼባ ብዛዕባ ልምዓት ምዃኑ በቶም ኣማሓደርቲ ኣብ’ቲ መእተዊ ተገሊፂሎም’ኳ እንተነበረ እቲ ኣኼባ ምስተጀምረ መዘራረቢ ዛዕባ ተቐይሩ ናይ 2007 ዓ/ም ዝካየድ ምስሉይ መረፃን ታሪኽ ኣወፃፅእ ህወሓትን  ናብ ዝብል ከምዝኣተውን ነቲ ኣኼባ መሳለጢ ከኣ ልዕሊ ክልተ ሚልዮን ብር ወፃኢ ተገይርሉ ከም ዘሎን ካብቲ ዝተረኸበ ሓበሬታ ንምፍላጥ ተኻኢሉ።