መንግስትታት እንግሊዝ፤ ነርወይን ዩናይትድ ስቴትን ዜጋታተን ናብ ኢትዮጵያ ከይገሹ ናይ መጠንቀቕታ መፀዋዕታ ከም ዘምሓላለፋ ተገሊፁ።

እቲ ዝረኸብናዮ ሓበሬታ ከም ዘመላኽቶ፣ ብሰንኪ እቲ ኣብ ኢትዮጵያ ብፍላይ ድማ ኣብ ክልል ኦሮሚያ ኣብ መንጎ ህዝብን መንግስትን ኣጋጢሙ ዘሎ ዘይምርድዳእ፣ ነዚ ስዒቡ ድማ ብርክት ዝበሉ ወገናት ብዕጡቛት ስርዓት ኢህወዴግ ህይወት ይጠፍእ ብምህላዉን ዘስዓቦ፣ እቲ  ህዝባዊ ተቓዉሞ ብዘይ ምህዳእ ተጠናኺሩ ይቕፅል ስለ ዘሎ፣ መንግስታት ነርወይ፤ እንግሊዝን ኣመሪካን ዜጋታተን ናብ ኢትዮጵያ ብፍላይ ድማ ናብ ክልል ኦሮሚያ ከይገሹን ከይንቀሳቐሱን ንዜጋታተን መጠንቀቕታ ኣመሓላሊፈን።

እዘን ሃገራት ብተወሳኺ፣ ዜጋታተን ፍሉይ ጥንቃቐ ክገብሩን ሓደሽቲ ምዕባለታት ክከታተሉ ከም ዘለዎም ብምምካር፣ ኣብዚ ሰሙን እዚ ኣብ ክልል ኦሮሚያ ዞባ ኣርሲ ኣብ ከተማታት ሻሸመኔን ኣጀን ብዝተፈጥረ ግጭት፣ ኣዝዩ ዝሰግአ ኤምባሲ ኣመሪካ፣ ካብ'ዚ ስዓት ኣትሒዞም ኣመሪካዉያን ዜጋታት ናብ'ተን ከባብታት ከይንቀሳቐሱ መጠንቀቕታ ምሃቡ ንምፍላጥ ተኻኢሉ።