ገዛኢ ስርዓት ኢህወደግ ነቲ ኣብ መላእ ክልል ኦሮምያ ዝተወለዐ ተቓውሞ ኣብ ትሕቲ ቁፅፅር ኣውዒለዮ ኣብ ዝብለሉ እዋን፣ ኣብ ዝተፈላለዩ ዓድታትን ከባብታትን እቲ ናዕቢ ተጋዲዱ ይቕፅል ከም ዘሎ ንምፍላጥ ተኻኢሉ።

እቲ ሓበሬታ ከም ዘረድኦ፣ ገዛኢ ስርዓት ኢህወደግ ነቲ ኣብ መላእ ክልል ኦሮምያ ዝተወለዐ ተቓውሞ ኣብ ትሕቲ ቁፅፅር ኣውዒለዮ ኣብ ዝብለሉ እዋን ብዝተፈላለዩ መንገድታትን ኣንፈታትን እቲ ናይ ህዝቢ ናዕቢ ተጋዲዱ ይቕፅል ከም ዘሎ ድሕሪ ምግላፅ፣ በዚ መሰረት ብ12 ለካቲት 2008 ዓ/ም ኣብ ወለጋ ሆሮጉድሩ ብፍላይ ኣብ ወረዳ ጃራቴ ከተማ ኣሊቦ ብልዑል ተሳተፎ ህዝቢ እቲ ተቓውሞ ቀፂሉ ከም ዝወዓለ እቲ ዝተረኸበ ሓበሬታ ኣረዲኡ።

እቲ ኣብ ሆሮጉድሩ ተቓውሞ ዘስምዕ ዝነበረ ህዝቢ ናብ ፅርግያታት ወፂኡ ነቲ መንገዲ ብምዕፃው ናብ ካልእ ከታማታት ንዝግበር መንግስታዊ ምንቅስቓስ ኣፀጋሚ ገይርዎ ከም ዝወዓለ ተፈሊጡ።

ኣብ መወዳእታ፣ ነቲ ተቓውሞ ህዝቢ ንምብታን ኣብቲ ከባቢ ዝተረኸቡ ፌደራል ፖሊስ ነቲ ሰልፈኛ ከቢቦም ኣብ ልዕሊ ገባራትን መናእሰይን ሰፍ ዘይብል ጉድኣት እኳ እንተውረዱ እንተኾነ ግን ነቲ ተቓውሞ ህዝቢ ብዝባኣሰ መልክዑ ክቕፅል ከም ዘኽኣሎ  እቲ ሓበሬታ ወሲኹ ኣረዲኡ።