ኣብ ከተማ ኣላማጣ ኣባላት ተቓወምቲ ውድባት ብምዃኖም ጥራሕ ብገዛኢ ጉጅለ ኢህወደግ ይኽሰሱን ይእሰሩን ምህላዎም ምንጭታትና ካብ’ታ ከተማ ሓቢሮም።

ምንጭታትና ከም ዝሓበርዎ ኣብ ዞባ ደቡብ ትግራይ፤ ወረዳ ኣላማጣ ፍሉይ ሽሙ ጅሃን ኣብ ዝተብሃለ ከባቢ እትነብር ወ/ሮ ፋጡማ ማሓመድ ዝተብሃለት ወገን ኣባል ተቓዋሚ ውድብ ኢዴፓ ብምዃና ጥራሕ ኣመሓደርቲ ብዓይኒ ፅልኢ ስለ ዝጠመትዋ ዜጋታት ካብ ኣላማጣ ናብ ስዑዲ ዓረብ ተሰጋግሪ  ኢኺ ብዝብል ፀለመ ብ15 ሚያዝያ 2007 ዓ/ም ስዓት 12 ናይ ምሸት ፌደራል ፖሊስ  ካብ ገዝኣ ኣሲሮም ከም ዝወሰድዋ ተፈሊጡ።

   እታ ኣባል ተቓዋሚ ዉድብ ኢዴፓ ዝኾነት ወገን ኣብዚ ሕዚ እዋን ኣብ ፖሊስ ጣቢያ ኣላማጣ ተኣሲራ ከም ትርከብ ድሕሪ ምግላፅ ንሳ ኣብ ዝመፅእ ወርሒ ግንቦት ዝካየድ ምስሉይ ሃገራዉን ክልላዉን መረፃ ንዉድባ ወኪላ ኣብቲ ከባቢ ክተወዳደር ኣፍልጦ ተዋሂብዋ ምንቅስቓስ ኣብ ትገብረሉ ዘላ ብዙሕ ሰዓብን ደጋፍን ከም ዘለዋ ዘስተብሃሉ ኣመሓደርቲ ገዛኢ ጉጅለ ኢህወዴግ ብዘይ ወዓለቶ ገበን እናኸሰሱን እናኣሰሩን ፈሪሓ ካብቲ መረፃ ዓርሳ ክተግልል ዝጥቀምዎ ዘለዉ ሕሱር ሜላ ምዃኑ ምንጭታትና ወሲኾም ሓቢሮም።